گیزلین ...................

کونلومی یاخدی آلا گوزلرین
جیرانا واردی یامان بنزرین
دوشنده یادیما شیرین سوزلرین
گوز یاشیم دونور قانه گیزلین

یارانمیشام من یالقیز ازلده ن
حالیمی سوروش ساری خزلده ن
آیریلمیشام سن کیمی گوزلده ن
گلمیشم گئجه لر جانه گیزلین

دوشئدی ارامیزداکی پرده
گورئیدیم او گول جمالی بیرده
یاشیل چمنده خلوتلی یئرده
چکه یئدیم تئلینه شانه گیزلین

رغبتیم یوخ چمنه سونبوله
سن اولان یئرده کیم باخار گوله
عشقین دوندردی اخیر بولبوله
اوخورام اوره گیمده ترانه گیزلین

یازیلسین بولار مزار داشیندا
قالدی گوزلریم ایکی قاشیندا
سن بیر نو گول من قیرخ یاشیندا
اودور کی اولموشام دیوانه گیزلین

.............................................بهمن وحدتی (باهار) اورومیه